Víkka rýmið

Ef þú málar veggi og loft í hvítum lit mun rýmið virka stærra og opnara. Ef ljósbláir litir eru málaðir á veggi og loft hefur það sömu áhrif – það minnir á víðáttumikinn himinn og opið haf. Með dökku gólfi eru oftar en ekki valdir fremur ljósir litir. „Þyngdin“ er þá öll á gólfinu en ljósi liturinn kallar fram birtu.

Stytta rýmið

Ef þú ert með langt rými getur verið ráð að mála endavegginn í dökkum, hlýjum lit en það mun þannig stytta það. Ef þú notar kaldari dökka liti mun það hafa aðeins minni áhrif en eigi að síður vekja upp sambærileg hughrif.

Oftar en ekki er gluggi á endavegg í rýmum sem þessum og kemur mjög vel út að hafa gardínur í sama lit og endaveggurinn til að ýta enn frekar undir þessa tilfinningu.

Breikka rýmið

Í herbergjum þar sem stutt er á milli veggja er gott að velja dökkt gólfefni og mála loftið einnig í dökkum lit. Þannig mun rýmið virka mun breiðara en það er í raun. Betra er gæta þess að mála ekki rönd niður á veggina heldur fylgja loftlínunni eftir nákvæmlega til að ýta undir áhrifin.

Þrengja rýmið

Ef þú ert með mjög breitt rými er gott að hafa endaveggi í sama lit og loftið eða öðrum mjög ljósum, hlutlausum litatón. Hliðarveggi svo í dekkri lit og þannig þrengja rýmið aðeins svo það umvefji mann. Betra er að hafa hliðarveggina í sama dökka litunum því margir afgerandi, sterkir litir geta skapað ákveðið ójafnvægi.

Lækka loftið

Ef hátt er til lofts og þú vilt lækka lofthæðina þá er gott að mála loftið í dekkri og mun meira afgerandi lit. Þessi aðferð getur gjörbreytt rýmum eins og t.d. baðherbergjum sem eru hvítmáluð eða prýdd ljósum flísum. Einnig er þetta skemmtileg leið til að skapa nýja stemningun í stofunni, svefnherberginu eða raunar hvar sem er! Það er svo smekksatriði hvort maður velur liti sem eru tón í tón eða jafnvel algerar andstæður.

Ef þú málar rönd með þeim lit sem þú velur á loftinu niður á vegg eða málar loftlista í stíl þá lækkar hæð rýmisins enn frekar.

Þétta herbergið

Ef þú vilt að rými taki virkilega vel utan um þig þá málar þú loft og veggi í sama dökka litnum en þannig næst mikil dýpt í það. Þetta er oft gert til að kalla fram þessa rólegu, umvefjandi stemningu í svefnherbergjum og sjónvarpsherbergjum. Þessi vinsæla aðferð virkar einnig mjög vel þar sem lofthæðin er mikil.

Brúnir tónar eða aðrir jarðlitir með rauðum undirtónum eru sérstaklega fallegir en einnig geta kaldari, bláir litir hentað vel. Með réttri lýsingu getur rýmið jafnvel virkað stærra.

Stækka rýmið

Langalgengast er að mála loftin hvít eða í hlutlausum, ljósum lit en með því kallar maður fram tilfinningu fyrir aukinni lofthæð. Ef þú málar rönd niður á vegginn með þessum ljósa lit ýtirðu enn frekar undir áhrifin. Þykkir, hvítmálaðir loftlistar verða einnig til þess að ýkja hughrifin.

Hvítmáluð loft halda alltaf gildi sínu en aðrir ljósir litir geta líka verið afskaplega fallegir.

Tvískiptir veggir

Ef þú vilt lækka loftið en halda því ljósu þá getur þú tvískipt veggjum og málað efri hluta þeirra í dökkum lit. Tvískiptir veggir eru vinsælir og sér í lagi í barnaherbergjum. Það er skemmtilegt að brjóta upp stemninguna á þennan máta. Gott er að líma vegglista eða frauðlista þar sem litirnir mætast því þannig skapast vídd sem er virkilega falleg og línurnar verða algjörlega beinar og fullkomnar.

Stakur veggur í lit

Að mála stakan vegg í rými í lit mun sennilega aldrei fara úr tísku. Þetta er í raun algengasta og auðveldasta leiðin til að kalla fram mikla breytingu á hvaða herbergi sem er með lítilli fyrirhöfn. Þessi aðferð er t.d. notuð ef gera á bakgrunn sem á að draga að sér athygli og hlaða ákveðinni orku í rýmið. Um þetta er enska heitið „featurewalls“ gjarnan notað, dæmi um það eru myndaveggir, sjónvarpsveggir og við höfðagafla í svefnherbergjum.