BYKO tekur þátt í tilraunaverkefninu Pikkoló - Sjálfbær þróun kaupmannsins á horninu. Pikkoló er heildstætt dreifikerfi fyrir matvæli sem versluð eru á netinu. Kerfið er hannað í þeim tilgangi að lágmarka óþarfa dreifingu matvæla, bæta lífsgæði fólks og minnka sóun á matvælum. Hugbúnaður Pikkoló tengir matvöruverslanir við Pikkoló dreifistöðvar staðsettar fyrir utan vinnustaði og á öðrum fjölförnum stöðum. Megin tilgangur þess er að spara fólki ferð í matvörubúð eftir langan vinnudag og koma í veg fyrir óþarfa magninnkaup. Hlutverk BYKO er að koma upp CLT (Cross Laminated Timber) einingarhúsi sem verður notað á lóð BYKO á Skemmuvegi á meðan þróunarvinna á sér stað. Markmið samstarfsins er að hanna og framleiða Pikkoló dreifistöðvarnar á sem umhverfisvænasta hátt sem kostur er.

Samstarf við Visttorg felur í sér þróun frumgerðar að fyrsta gagnagrunni og umhverfisgátt grænna byggingarvara hér á landi, þar sem markmiðið er að veita betri yfirsýn yfir umhverfisvænar byggingarvörur á íslenskum markaði og spara þannig tíma og auðvelda vinnu arkitekta, hönnuða, verktaka, söluaðila og hins almenna húsbyggjanda þegar byggja skal vistvænt eða umhverfisvottað hús.

Markmiðið er að Visttorg verði vettvangur grænni byggingariðnaðar og hreyfiafl til þekkingar, fræðslu og stefnumótunar allra aðila innan mannvirkjageirans á Íslandi. Hlutverk BYKO er að taka þátt í þróunarvinnu gagnagrunnsins ásamt upplýsingagjöf um umhverfisvænar byggingavörur.